Британиялик афсонавий мусиқачи ва бастакор, "The Beatles" гуруҳи асосчиларидан бири бўлмиш Пол Маккартни "Iʼve Got A Feeling" қўшиғини марҳум хонанда Жон Ленноннинг виртуал қиёфадоши билан биргаликда ижро этди. Ўзига хос чиқиш Гластонбери мусиқа фестивали учун ташкил этилган.

Леннон саҳнадаги улкан экран орқали "кўриниш берган". Маккартнининг айтишича, виртуал дуэт ғояси режиссёр Питер Жексонга тегишли. Жексон ўтган йили “The Beatles” гуруҳига тегишли бўлган видеоқайдлар асосида 3 қисмдан иборат бўлган ҳужжатли фильм суратга олган ва унга “Get Back” деб ном берган.

"Биламан, бу виртуал қиёфа, аммо бу Жон. Биз яна биргамиз", деди Маккартни саҳнадан туриб мухлисларга қарата.

Пол Маккартнининг фестивалдаги чиқиши 2 соату 50 дақиқа давом этган. Ижодкор умумий ҳисобга 36 та куйлаган.

Эслатиб ўтамиз, “The Beatles” гуруҳи асосчиларидан бири бўлган Жон Леннон 1980 йилнинг 8 декабрь куни мухлиси томонидан ўлдирилган.

• Санъат
• Шоу-бизнес
• машҳурлар