АҚШ Ҳукумат самарадорлиги департаменти раҳбари ва Доналд Трампнинг энг яқин маслаҳатчиларидан бири Илон Маск мамлакат ҳукумати томонидан молиялаштириладиган “Америка овози” ва “Озодлик радиоси” фаолиятини тугатишга чақирган. Бу ҳақда у ўзининг X ижтимоий тармоғидаги саҳифасида маълум қилди.

“Ҳа, уларни ёпинг! Европа аллақачон озод. Шундай эмасми? Уларни ҳеч ким эшитмайди”, – деган Маск.

Буларнинг барчаси ўзаро суҳбат қилаётган, шу билан бирга солиқ тўловчиларнинг йилига бир миллиард долларини “ёқиб юбораётган ғалати чап радикаллар”, – деб ёзган у Трампнинг тарафдоридан бири Ричард Гренелл бошлаган мунозарада қатнашиб.

Трампнинг махсус топшириқлар бўйича вакили Гренелл ушбу радиостанцияларни ўта чап кун тартибини илгари суришда айблаб, бу “ўтмиш қолдиқлари”ни ёпиш вақти келмадими, деган саволни ўртага ташлаган эди.

Ҳозирча мамлакат расмийларининг ҳеч бири Маскнинг баёнотларига изоҳ бергани йўқ. Лекин, DOGE раҳбарининг USAID (АҚШ Халқаро тараққиёт агентлиги)ни ёпиш ҳақидаги чақириқлари Трамп маъмурияти томонидан қўллаб-қувватланган эди.

• АҚШ
• Ilon_Mask
• Озодлик радиоси