Тошкент вилоятининг Ўрта Чирчиқ туманида жойлашган "Туябўғиз" сув омборида браконьерликка қарши кураш бўйича навбатдаги мониторинг ва назорат тадбирлари бўлиб ўтган.

Рейд давомида Экология, атроф-муҳитни муҳофаза қилиш ва иқлим ўзгариши вазирлиги давлат инспекторлари ҳамда “Golden Fish Group” МЧЖ қўриқлаш хизмати ходимлари томонидан ноқонуний ов қилишга уриниш ҳолатлари аниқланган.

Натижада сувга тўр ташлаб, балиқ овламоқчи бўлган 3 нафар ҳуқуқбузар қўлга олиниб уларга нисбатан МЖтКнинг 90-моддаси 1-қисми билан маъмурий баённома расмийлаштирилди. Ҳуқуқбузарларнинг ҳар бири базавий ҳисоблаш миқдорининг 10 баробари — 3 миллион 300 минг сўмдан жаримага тортилди. Қолаверса, сув омборига номаълум шахслар томонидан қўйилган 2500 метр лескали тўрлар йиғиб олиниб, тўрга илинган балиқлар сувга қўйиб юборилди.

Шунингдек, тадбир давомида балиқ овловчиларга ноқонуний усуллар ва тақиқланган қуроллар билан ов қилмаслик юзасидан тарғибот-ташвиқот ишлари олиб борилди.

• Baliq
• Baliqchilik
• Jurnalistik surishtiruv reydi