Нью-Йорк губернатори Кети Хокул маймунчечак туфайли штат бўйлаб фавқулодда ҳолат эълон қилди.
“Мен маймунчечак эпидемиясини назорат қилиш бўйича давом этаётган саъй-ҳаракатларимизни кучайтириш учун штат бўйлаб фавқулодда ҳолат эълон қиламан. Ушбу ижро фармони бизга тезроқ жавоб беришга имкон беради ва тиббиёт мутахассисларига кўпроқ Нью-Йоркликларни эмлашга кўмаклашиш учун қўшимча чоралар кўриш имкониятини беради”,– деб ёзади Хокул Twitter саҳифасида.
Унинг қўшимча қилишича, АҚШда маймунчечак билан касалланган ҳар тўртдан бир фуқаро айнан Нью-Йорк штатида қайд этилган.
АҚШ Касалликларни назорат қилиш ва олдини олиш марказларининг (CDC) сўнгги маълумотларига кўра, мамлакатда маймунчечак билан касалланган 5189 та ҳолат аниқланган, улардан 1345 таси Нью-Йоркка тўғри келади.
Ўтган ҳафта ЖССТ ушбу эпидемияни халқаро аҳамиятга молик фавқулодда ҳолат деб эълон қилди, аммо эпидемия Европадан ташқари дунёнинг барча минтақалари учун ўртача хавф туғдиришини таъкидланган.
Шу билан бирга, ЖССТ дунё мамлакатларига маймунчечакка қарши оммавий эмлашни тавсия этмаслиги ва мавжуд ваксиналар маймунчечакка қарши қанчалик самарали эканлиги ҳақида ҳали маълумотларга эга эмаслигини билдирган.
Маълумот учун, маймунчечак камдан-кам учрайдиган вирусли инфекция бўлиб, у одамлар орасида ҳам юқади. Бу одатда енгил ҳолат бўлиб, кўпчилик бир неча ҳафта ичида тузалиб кетади, аммо баъзиларида асоратлар пайдо бўлиши мумкин. Маймунчечакнинг дастлабки белгиларига иситма, бош оғриғи, мушак оғриғи, бел оғриғи, шишган лимфа тугунлари, титроқ ва чарчоқ киради.
Шунингдек, баъзи жойларда тошма пайдо бўлиши мумкин, кўпинча юздан бошланади ва кейин тананинг бошқа қисмларига тарқалади.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!