Келажакда одамлар телефонлардан фойдаланмайди, мия имплантлари алоқа мақсадларида қўлланилади, деди америкалик бизнесмен Илон Маск. Бу ҳақда “Закон.кз” хабар берди.

Х ижтимоий тармоғида фойдаланувчилардан бири янги телефонни ўз фикрлари кучи билан бошқариш имконини берувчи Neuralink интерфейсини бошқа одамлар ўрнатадими, деб сўради. Илон Маск ушбу постга изоҳ бериб, келажакда “телефонлар бўлмайди, фақат Neuralink бўлади” деб таъкидлаган.

Унинг фикрича, келажакда одамларга мобил қурилмалар умуман керак бўлмайди.

Аввалроқ, Илон Маскнинг Neuralink компаниясидан мия имплантацияси ўрнатилган биринчи бемор шахматни фикр кучи билан ўйнаш қобилиятини намойиш қилган эди. Бахтсиз ҳодисадан сўнг фалаж бўлган 29 ёшли Нолан Арбау ноутбук экранида курсорни бошқариши ва шахмат доналарини ҳаракатга келтира олишини кўрсатди.

Neuralink - Илон Маск томонидан асос солинган компания бўлиб, у имплантация қилинадиган мия-компьютер интерфейсларини ишлаб чиқиш ва ишлаб чиқаришни режалаштирмоқда.

• Ilon_Mask
• Telefon