Қайд этилишича, 20 декабрдан узрли сабабга кўра, ўқишни кўчириш бўйича аризалар ҳудудий ишчи гуруҳлар томонидан қабул қилина бошланган.

Белгиланган тартибга мувофиқ 2 та узрли сабабга кўра, давлат олий таълим муассасалараро ўқишни кўчириш ҳақидаги аризаларни қабул қилиш учун 13 та олий таълим муассасасида ҳудудий ишчи гуруҳлар ташкил этилган.

Ишчи гуруҳлар 2025 йилнинг 20 январь кунига қадар ҳар куни соат 9:00 дан 17:00 гача фаолият кўрсатади.

Шунингдек, ҳудудий ишчи гуруҳларга аризачи қуйидаги ҳужжатларни (офлайн) тақдим этади:

– ўқишни кўчириш бўйича ариза (ариза бланкаси ҳудудий ишчи гуруҳ томонидан берилади ва талаба уни жойида тўлдиради);

– талабанинг рейтинг дафтарчаси ёки белгиланган шаклдаги академик маълумотнома ёки транскрипт нусхалари (биттаси бўлса етарли);

– паспорт нусхаси;

– узрли сабабларни асословчи тегишли ҳужжатлар.

Маълумот учун, 2 та узрли сабаб қуйидагилар:

– талаба оила қуриши муносабати билан турмуш ўртоғи доимий яшайдиган ҳудуддаги олий таълим муассасасига ўқишини кўчириш учун мурожаат қилганда;

– давлат органларининг ходимлари иш жойи ўзгарган тақдирда унинг турмуш ўртоғи ёки вояга етмаган фарзанди ўқишини кўчириш учун мурожаат қилганда, тегишли вазирлик (идора) раҳбарининг тавсияси асосида.

• O'qishni ko'chirish
• ОТМ