Самарқанд вилояти Булунғур туманида 17 ёшли йигитнинг ўз жонига қасд қилишига сабаб бўлган профилактика инспекторига суд ҳукми ўқилди.  Қайд этилишича, 2025 йилнинг 20 февраль куни 2008 йилда туғилган Б.Б. (ўғил бола) амакисига тегишли Cobalt автомашинасини ўзбошимчалик билан ҳайдаб чиқиб кетган. Мазкур ҳолат юзасидан 102 рақами орқали Самарқанд вилояти Ички ишлар бошқармасининг навбатчилик қисмига мурожаат келиб тушган ва ҳолат Булунғур тумани “Килдон” маҳалла фуқаролар йиғини профилактика катта инспектори Х.И.га бириктирилган.

Шундан сўнг инспектор ва Б.Б.нинг яқинлари биргаликда йигитни қидирган. Икки кун давом этган қидириш ишларидан сўнг, 21 февраль куни йигит Жиззах вилояти Зарбдор туманидан топилиб, соат 19:00 ларда уйга олиб келинган. Шундан сўнг инспектор ўсмирни ички ишлар ходимларидан олиб чиқиб келганини ва 400 минг сўм пул берганини айтиб, уларни алдаб ишончига кириб, ушбу пулларни талаб қилган.

Суд ҳужжатларига кўра, профилактика инспектори йигитни уйдан олиб чиқиб кетиб, тартибга кўра у билан педагогик ва психологик профилактика тадбирлари ўтказмаган ва тегишли ҳужжатларни расмийлаштирмаган. Аксинча, унинг қариндошларига “бу бола қамалади, энди қонун олдида жавоб бериши керак”, – деган мазмундаги гапларни айтиб, қўрқитган.

Ўсмир Б.Б. қамалишидан қўрқиб, стресс ҳолатига тушиб, 22 февраль куни уйининг молхонасида 20 литрлик елим идиш (канистр)да мавжуд бўлган дизель ёнилғисини устига сепиб, ўзига ўт қўйган. Оқибатда оғир даражадаги куйиш жароҳати билан шифохонага ётқизилган. Унга шифокорлар 2 ойдан кўпроқ вақт давомида тиббий ёрдам кўрсатган бўлишига қарамасдан, 6 май куни Республика шошилинч тез тиббий ёрдам илмий маркази Самарқанд филиалида вафот этган.

2025 йил 4 декабрь куни жиноят ишлари бўйича Паяриқ туман суди профилактика инспектори Х.И.ни Жиноят кодексининг 168-моддаси билан айбли деб топиб, унга нисбатан 2 йил муддатга Ички ишлар органлари тизимида ишлаш ҳуқуқидан маҳрум қилган ҳолда, 2 йил-у 6 ой муддатга озодликдан маҳрум қилиш жазоси тайинланди. Собиқ ходим суд залининг ўзида қамоққа олиниб, манзил-колонияга юборилди.

• Жиноят
• Самарқанд
• Суд