Бугун, 27 сентябрь куни моҳир таржимон, Ўзбекистон халқ шоири Жамол Камол 84 ёшида вафот этди.

Қайд этиш мумкин, Жамол Камол 1938 йил 26 апрель куни Бухоро вилоятининг Шофиркон туманида туғилган.

Жамол Камолнинг илк шеърий тўплами – “Олам кирар юрагимга” 1968 йилда нашр этилган. Бундан ташқари “Чўққиларга ёғилди ёғду” (1970), “Тош туғёни” (1972), “Ҳасан ва ой” (1974), “Қуёш чашмаси” (1975), “Қадаҳ” (1978), “Достонлар” (1980), “Сувайдо” (1982), “Умидли дунё” (1988) каби шеърий тўпламларига кирган шеърларида мумтоз шеърий анъаналар билан замонавий шеърий жараён ўзаро уйғунлаштирилган.

Ижодкор француз мумтоз адабиётининг намояндаси Буалонинг “Шеърий санъат”, Жалолиддин Румийнинг олти китобдан иборат “Маснавийи маънавий” ва Фаридуддин Аттор асарлари, Абдураҳмон Жомийнинг ғазаллар китоби, Шайх Маҳмуд Шабустарийнинг “Гулшани роз”, буюк инглиз драматурги Уильям Шекспирнинг ўндан ортиқ асарларини бевосита инглиз тилидан, Александр Пушкининг “Моцарт ва Сальери”, Ян Райниснинг “Олтин тулпор”, Бартольд Брехтнинг “Сичуандан чиққан меҳрибон асарларини юксак маҳорат юилан таржима қилган.

Жамол Камол шеърлари рус, инглиз, француз, поляк, украин, турк, озарбайжон, тожик ва бошқа кўплаб тилларга таржима қилинган.

• Таъзия