Ўзбекистонда ҳаво ифлосланишини кучайтирган ҳарорат инверсияси 16—17 январга қадар сақланиши кутилмоқда. Бу ҳақда Экология ва иқлим ўзгариши миллий қўмитаси хабар берди.

Сўнгги кунларда мамлакатда ҳарорат инверсияси билан боғлиқ ноқулай метеорологик шароитлар оқибатида ҳаво сифатининг пасайиши кузатилмоқда. Экология ва иқлим ўзгариши миллий қўмитаси раиси ўринбосари Искандар Қутбиддиновнинг маълум қилишича, ушбу ҳодиса кундузги ва кечки ҳаво ҳароратининг айрим ҳолларда 14 градусгача кескин фарқ қилиши, туман тушиши, шамол тезлигини пасайиши натижасида ифлослантирувчи моддаларнинг атмосфера ҳавосида тарқалишини қийинлаштирмоқда.

Мутахассисларнинг таҳлилларига кўра, ноқулай метеорологик шароитлар 16—17 январга қадар сақланиши кутилмоқда. Антисиклонлар келиши натижасида ёғингарчилик ёғиши ва шамол тезлиги ошиши билан атмосфера ҳавоси сифати нормаллашуви кутилмоқда.

“Ўзгидромет” ахборотида келтирилишича, 8 январь куни соат 09:00 ҳолатига кўра, Тошкент шаҳрининг атмосфера ҳавосидаги PM10 майда дисперсли заррачаларнинг миқдори рухсат этилган меъёрлардан ошмади. ПМ2,5 майда дисперсли заррачалар миқдори 101 мкг/м3 ни ташкил этди, рухсат этилган меъёрлардан (60 мкг/м3) 1,7 марта ошган.

Искандар Қутбиддиновнинг қайд этишича, махсус комиссия экологик ҳолат юзасидан аҳолига мунтазам ахборот бериш билан бирга тегишли ташкилотлар фаолиятини мувофиқлаштирмоқда. Бугунги кунда махсус комиссиясининг эътибори саноат ва хўжалик объектларида экологик рейдлар ва назорат тадбирларига қаратилган.

Ноқулай об-ҳаво шароитида атмосфера ҳавосига антропоген (яъни инсоний фаолият)нинг юкламасини камайтириш учун корхоналарнинг қувватлари чекланмоқда ва айримларининг фаолияти тўхтатилмоқда.

1—7 январь кунлари Тошкент шаҳридаги 12 та ва Тошкент вилоятидаги 22 та ишлаб чиқариш корхонасида текширувлар ўтказилди ҳамда таъсирчан чоралар кўрилган. Атмосфера ҳавосини ифлослантирган ўнлаб автотранспорт воситаларига нисбатан маъмурий чоралар қўлланилган. Шу билан бирга, профилактик чоралар ҳам амалга оширилмоқда: ташлама манбалари устидан мониторинг кучайтирилди, атмосфера ҳавоси сифати тезкор баҳолаб борилмоқда.

“Махсус комиссия томонидан экологик рейдлар ва мониторинг тадбирлари инверсия якунлангач ҳам давом эттирилади. Кўрилаётган барча чоралар юзага келган хавфларни минималлаштириш ҳамда аҳолининг экологик хавфсизлигини таъминлашга қаратилган. Барча чора-тадбирлар илмий асосланган тавсияларга қатъий риоя қилган ҳолда амалга ошириб келинмоқда”, – деди Экология ва иқлим ўзгариши миллий қўмитаси раиси ўринбосари.

Ҳарорат инверсияси қисқа муддатли ва олдиндан прогноз қилинадиган метеорологик ҳодиса бўлиб, бу даврда давлат ташкилотлари кучайтирилган режимда иш олиб боради ва ифлосланишни юмшатиш учун синовдан ўтган чора-тадбирлар амалга оширилади.

• Давлат экология қўмитаси
• Havo
• Ifloslanish