Маълум қилинишича, Ўзбекистонда айни дам муомалада бўлиб турган сўмдаги пуллар сони 152 млн донани ташкил қилади.

Муомаладаги нақд пуллар таркибида уларнинг миқдори бўйича 200 000 сўмлик банкнотлар улуши 2024 йилда – 18,6 фоиздан 23,4 фоизга, 20 000 сўмликнинг улуши – 4,4 фоиздан 6,7 фоизга етган бўлса, 100 000 сўмлик банкнотлар улуши – 42,5 фоиздан 40,9 фоизга, 50 000 сўмликнинг улуши – 20,5 фоиздан 16,6 фоизга камайган.

2025 йил 1 январь ҳолатига кўра, нақд пул муомаласини ташкил этишда аҳолига қулайлик яратишга қаратилган чора-тадбирлар доирасида муомаладаги эски намунадаги банкнотларни босқичма-босқич қайтариб олиш ва уларни янгилари билан алмаштириш чоралари кўрилган. Натижада, 5 000 сўмлик банкнотлар таркибида эски намунадаги банкнотлар миқдори 2023 йилдаги 67 фоиздан 2024 йилда 25 фоизга, 10 000 сўмлик банкнотларда – 64 фоиздан 24 фоизга, 50 000 сўмлик банкнотларда – 61 фоиздан 25 фоизга ва 100 000 сўмлик банкнотларда – 39 фоиздан 18 фоизга қисқарган.

Марказий банк маълумотларига таянадиган бўлсак, муомалада бўлган ҳар 5 та пулдан 2 таси (40,9 фоизи) 100 000 сўмлик банкнотадир.

Ўтган 2024 йил давомида 200 000 сўмлик банкнота 50 000 сўмликни қувиб ўтиб, муомалада бўлган банкноталар миқдори бўйича иккинчи ўринга кўтарилган.

Айни пайтда барча пулларнинг 23,4 фоизи 200 000 сўмлик ҳисобланади. Ушбу банкнота муомалага чиқарилган илк йилда бу кўрсаткич 11 фоиздан бироз юқори эди.

Инфляция ва аҳолининг даромадлари ошиб бориши натижасида 200 000 сўмлик пуллар оммалашишда давом этиши кутилмоқда.

• Марказий банк
• Сўм
• pul