2023 йил якунларига кўра, саноат маҳсулотларини ишлаб чиқариш 6 фоизга ошган ва барча муҳим тармоқларда ўсиш суръатига эришилган.Бу ҳақда UzA хабар берди.

МҲТИ экспертларининг таҳлилича, саноат соҳасидаги ўсишнинг интенсивлиги 2022 йилдагига нисбатан 0,8 фоизга юқори бўлган. ЯИМ таркибида саноатнинг улуши 26,1 фоизни ташкил этган ва қўшилган қиймат ҳажми бўйича хизмат кўрсатиш соҳасидан сўнг иккинчи ўринни эгаллаган.

Бунда саноат соҳасидаги ўсишнинг асосий драйвери бўлган ишлаб чиқариш саноати таркибий ўзгаришларнинг энг яхши суръатини намойиш этган. 

Шунингдек, мазкур тармоқда маҳсулот ишлаб чиқариш 6,7 фоиз ошган. Умуман, саноат бўйича ўртача ўсиш индексидан 0,7 фоиз юқори бўлган. Бу эса тармоқнинг саноат таркибидаги улушини 84,4 фоизгача ошириш имконини берди. 

Саноат маҳсулотларини ишлаб чиқаришдаги ўсишнинг ярмидан ортиғи (53,4 фоиз) машинасозлик маҳсулотлари (107,4 фоиз), тўқимачилик маҳсулотлари ва кийим-кечаклар (107,2 фоиз), салқин ичимликлар ва тамаки маҳсулотлари (105,9 фоиз)ни ишлаб чиқарувчи корхоналар ҳисобига таъминланган. 

Ҳудудлар рейтингида ишлаб чиқарилаётган маҳсулотлар ҳажмида истеъмол товарларининг энг катта улуши Андижон вилояти, Тошкент шаҳри, Тошкент вилоятида қайд этилган. Бошқа ҳудудларда истеъмол товарларини ишлаб чиқаришда катта захиралар сақланиб қолмоқда, дейилади МҲТИ таҳлилида.

• mashinasozlik
• sanoat
• tovar