“Ўзатом” агентлиги матбуот хизмати хабарига кўра, Ўзбекистон ва Италия атом энергетикаси соҳасидаги ҳамкорликни кенгайтиради.

Агентлик директори Азим Аҳмадхўжаев бошчилигидаги делегатсия амалий ташриф билан Италиянинг Генуя шаҳрида бўлиб турибди. 20-октябрь куни Ансалдо Энергиа холдинги ва унинг атом энергетикаси технологияларига ихтисослашган компанияларидан бири — Ансалдо Нуcлеаре раҳбарияти билан учрашув бўлиб ўтди. Холдинг Европа энергетика секторида энергия ускуналарини, шу жумладан буғ ва газ турбогенераторларини лойиҳалаш, муҳандислик, ишлаб чиқариш ва етказиб бериш билан шуғулланувчи етакчи ўйинчи ҳисобланади.

Кун тартибидан, Ўзбекистонда биринчи атом электр стансиясини қуриш лойиҳасини амалга оширишда технологик интегратсия ва италиялик ҳамкорларнинг ёрдамчи тизимлари ечимларини Ўзбекистон иқлим шароитига мослаштириш бўйича ҳамкорликни ривожлантириш масалалари ўрин олган.

Италия томони хавфсизлик тизимларини яратиш ва улар учун дастурий таъминотни ишлаб чиқиш, атом электр стансиялари учун асосий ва ёрдамчи ускуналарни етказиб бериш бўйича катта тажрибага эгалиги, шунингдек, Хитой, Белгия, Словения, Венгрия ва Украина каби мамлакатларда АЭСларни баҳолаш ҳамда уларга техник хизмат кўрсатиш билан бир қаторда ишлатилган ядро ёқилғиси билан ишлашда юқори профессионаллик тўғрисида сўзлаб берди.

Холдинг компанияларини Ўзбекистонда АЭС қурилиши лойиҳасини амалга оширишни назорат қилиш, шунингдек, самарали ёрдамчи ечимларни ишлаб чиқиш учун техник маслаҳатчилар сифатида жалб қилиш имкониятлари муҳокама қилинди.

Ансалдо Нуcлеаре компаниясининг ўз ишланмаси бўлган ишлатилган ядро ёқилғисини бошқариш тизимларини олиш имконияти радиоактив чиқиндилар билан ишлаш соҳасида компания билан ўзаро ҳамкорлик қилиш хусусиятлари батафсил ўрганилди.

Шу билан бирга, Италия томони миллий норматив-ҳуқуқий базани шакллантириш ва литсензиялаш бўйича маслаҳат фаолиятини амалга ошириш, шунингдек, икки мамлакат манфаатлари йўлида атом соҳасида технологияларни доимий равишда такомиллаштириш ва кадрлар тайёрлаш мақсадида қўшма илмий-тадқиқот ва тажриба-конструкторлик ишларини (ИТТКИ) ташкил этишга қизиқиш билдирди.

2025 йилнинг майида “Ўзатом” агентлиги ва Италиянинг Ансалдо Энергиа компанияси ўртасида англашув меморандуми имзоланганди. Ҳужжат Италия компаниясининг илғор технологиялари ва тажрибасини қўллаган ҳолда кадрлар ва илмий-техник салоҳиятни ошириш, саноат кооператсиясини ривожлантиришга қаратилган.

• АЭС
• Ҳамкорлик
• Италия
• kompaniya