Асли ўзбекистонлик бўлган россиялик миллиардер ва Форбес рўйхатида 112-ўрин эгаси Алишер Усмонов Италиянинг Тgcom24 нашрига берган интевьюсида ўз саъй-ҳаракатлари ва маблағларини Ўзбекистонга йўналтиришини маълум қилди.

Усмонов ўз интервьюсида Ўзбекистонда уч хил давр гувоҳи бўлганини айтди. Биринчиси, республика Совет Иттифоқи таркибига кирганда; иккинчиси, 1991 йилда мустақилликка эришганида; учинчиси ва ҳозиргиси 2016 йилда бошланган янги Ўзбекистон.

Маълумотларга кўра, Усмонов ҳозирда Тошкентда. Тахминларга кўра, у бу ерга уруш бошланганидан ва Европа Иттифоқи томонидан унга нисбатан жорий қилинган санкциялардан кейин учиб келган.

“Ўзбекистонга ёрдам бериш, ватанимга фойдали бўлиш учун бор куч ва имкониятларимни сарфлайман. Бу менинг энг катта мақсадим, бунинг учун бизнес бошқарувидан ва ҳатто кўплаб лойиҳаларим акциядори бўлишдан воз кечдим”, — дейди Усмонов.

Усмонов ўзининг олигарх эканини бир неча бор рад этган бўлиб, бойлигини очиқ бозорда бизнес юритиш ортидан тўплаганини таъкидлаб келади.

“Мен ҳукуматдан ҳеч қачон совға олмаганман. Бизнинг холдингда биз қилган барча ишлар бозор шартлари асосида амалга оширилди”, — дея қўшимча қилади бизнесмен.

• Алишер Усмонов
• Ўзбекистон