Жорий йилнинг 7 май куни АҚШ Ҳаво ва денгиз операциялари ходимлари Виэкес оролига ноқонуний киришга уринган тўрт нафар Ўзбекистон фуқаросини қўлга олди. Бу ҳақда АҚШ Божхона ва чегара хизмати хабар берди.

Маълум қилинишича, бўлинма Виэкес оролига киришга уринган 7 нафар йўловчини олиб кетаётган қайиқни текширган. Йўловчилардан уч нафари АҚШ фуқаролари бўлган. Қолган тўрт нафари, яъни уч эркак ва бир аёл Ўзбекистон фуқароси бўлиб чиққан.

Ўзбекистон фуқароларининг АҚШга кириши ёки у ерда қолиши учун ҳеч қандай ҳужжати бўлмаган.

Қўриқлаш хизмати ходимлари тўрт нафар ўзбекистонликни иммиграцияни расмийлаштириш ва олиб чиқиб кетиш учун ҳибсга олган.

Дастлабки маълумотларга кўра, ушбу кема АҚШ Виржин оролларидаги Сен-Жон оролидан йўлга чиққан.

Аввалроқ АҚШ Президенти Доналд Трамп маъмурияти Ўзбекистонга Тошкент Қўшма Штатлардан депортация қилинган муҳожирларни қабул қилиши учун унга бир қатор махсус имтиёзларни таклиф қилгани ҳақида хабар берилган эди. Трамп маъмурияти учинчи давлатлар фуқароларини депортация қилишда мамлакатлардан транзит пунктлари сифатида фойдаланмоқчи. Хусусан, Ўзбекистон билан музокаралар доирасида АҚШ расмийлари мамлакатдан депортация қилинаётган россияликлар ва беларуслар учун транзит пункти сифатида фойдаланишга қарор қилган.

• АҚШ
• Депортация
• Ўзбекистон
• fuqaro
• migrant