Истанбулда ўзбекистонлик Дурдона Ҳакимованинг ўлдирилиши бўйича тергов давом этмоқда. Аёлнинг жасади Шишли туманидаги чиқинди қутисидан топилган. Бу жиноят кенг жамоатчилик эътирозига сабаб бўлди.

Sabah нашри маълумотларига кўра, фожиа 24 январь куни кечқурун маълум бўлган. Дуатепа маҳалласида иккиламчи хомашёларни йиғиштираётган О.Ч. исмли шахс Қўюлубоғ кўчасидаги чиқинди қутисида турган ўрамда аёлнинг жасадини топган.

Эркак топилма ҳақида полицияга хабар берган. Воқеа жойига етиб келган криминалистлар контейнерда аёлнинг бошсиз жасадини топди. Кейинроқ қўшни кўчаларни кўздан кечириш чоғида жасаднинг қолган қисмлари солинган жомадон топилди.

Хабар берилишича, жиноят изидан Ўзбекистоннинг икки нафар фуқароси Туркиядан Грузияга учиб кетмоқчи бўлганида қўлга олинган.

Дурдона Ҳакимованинг ўлдирилиши Истанбул ва Анқарада норозилик намойишларига сабаб бўлди. Истанбулда акция иштирокчилари “Усмонбей” метро бекатидан марҳумнинг жасади топилган кўчагача пиёда юриб борди. Намойишчилар “Мигрант аёллар ёлғиз эмас” ва “Аёллар ҳаёти муҳим” деган ёзувлар билан кўринган.

• Аёллар
• Истанбул
• Жиноят
• Намойиш
• Қотиллик
• Туркия