Жорий йилнинг 13 апрель куни Ўзбекистон фуқароси томонидан Истанбул метрополитенида рухсатсиз тарзда турк фуқароси бўлган аёлни суратга олиш ҳолати аниқланган. Ушбу ҳаракат аёл томонидан ҳуқуқ-тартибот органларига маълум қилинганидан сўнг фуқаро қўлга олинган, ҳолат юзасидан тергов ҳаракатлари бошланган.

Натижада:

– фуқаронинг Туркияда ишлаш ҳуқуқини берувчи рухсатномаси (Çалışма izni) бекор қилинди;

– унга нисбатан маъмурий жазо ва мажбурий депортация чоралари кўрилмоқда;

– ушбу ҳаракат шахсий ҳаёт дахлсизлигини бузиш сифатида баҳоланган.

Бош консулхона аралашуви натижасида мазкур фуқарога нисбатан жиноий жавобгарлик билан боғлиқ бўлмаган чора кўрилишига эришилган.

Туркия қонунларига кўра, бошқа шахсни, айниқса аёлларни, уларнинг розилигисиз суратга олиш ёки видеога тушириш қатъиян ман этилади ва бу жиноий жавобгарликка олиб келиши мумкин.

“Ҳурматли юртдошлар, Туркияда бўлишингиз давомида маҳаллий қонун-қоидаларга қатъий риоя қилинг. Бегона шахсларни уларнинг рухсатисиз суратга ва видеога олиш ёки уларга ноқулайлик туғдирувчи ҳаракатлар сизга нисбатан жиддий чоралар кўрилишига сабаб бўлиши мумкин.

Ҳуқуқий муаммоларга йўлиқмаслик учун ҳаракатларингизда эҳтиёткор бўлинг”, – дейилади консулхона хабарида.

• Истанбул
• Метро
• Туркия
• migrant