Бугун тонгда Украина дронлари Россиянинг бир қатор ҳудудларига ҳужум уюштирган. Ҳужум натижасида Самара ва Рязан вилоятларидаги нефтни қайта ишлаш заводларида ёнғин чиққани маълум қилинди.

Рязан вилояти ҳокимияти дронлар ҳужуми фактини тасдиқлади. Хусусан, Рязан вилояти губернатори Павел Малков корхона ҳудудига вайроналар тушиб кетгани, оқибатлари бартараф этилаётгани ҳақида хабар берган.

Шунингдек, Пенза шаҳридаги “Электроприбор” ва маҳаллий радиозаводга ҳам дронлар ҳужум қилгани хабар берилмоқда. Маълумотларга кўра, шаҳар устида бешта портлаш қайд этилган.

Бу завод Россия Федерацияси ҳарбий-саноат комплекси учун катта аҳамиятга эга. Унинг фаолияти бевосита мудофаа соҳаси ва давлат мудофаа буюртмасини амалга ошириш билан боғлиқ.

Россия Мудофаа вазирлиги тунда Украинанинг 112 та учувчисиз учиш қурилмасини уриб туширганини маълум қилган. Вазирликка кўра, улар Ростов вилояти ва Краснодар ўлкаси устида уриб туширилган.

• Россия
• Украина
• дрон
• hujum