“Тошкент шаҳри ва вилоятида ёмғир ёққанига қарамай атмосфера ҳавосидаги майда заррачалар (ПМ2,5 ва PM10) концентрацияси сезиларли даражада камайгани кузатилмади”, – деб хабар бермоқда “Ўзгидромет”. Маълум қилинишича, туман даврида ва ёмғирдан сўнг PM2,5 концентрациясининг ошиши кенг тарқалган ҳолат ҳисобланади. Ёмғир визуал жиҳатдан ҳавони “тозаловчи” омил сифатида қабул қилинса-да, атмосферадаги ҳақиқий жараёнлар анча мураккабдир.

“Туман шунчаки намлик эмас, балки майда сув томчилари мажмуаси бўлиб, уларда чанг ва қоракул заррачалари тўпланади, шунингдек, иккиламчи аэрозоллар шаклланади. Туман шароитида, одатда, шамол суст бўлади, ҳаво айланиши чекланади ва ҳарорат инверсияси кузатилади. Ушбу омиллар ифлослантирувчи моддаларнинг атмосферанинг ерга яқин қатламида ушланиб қолишига сабаб бўлади, бу эса ПМ2,5 концентрациясининг ошишига олиб келади”, – дейилади “Ўзгидромет” хабарида.

Кучли ёғингарчилик пайтида йирик ёмғир томчилари ифлослантирувчи моддаларни самарали равишда ювиб туширади ва натижада кўрсаткичлар вақтинча пасайиши мумкин. Бироқ ёмғирдан сўнг майда дисперс заррачалар концентрациясининг қайта ошиши эҳтимоли мавжуд.

“Бу юқори намлик шароитида заррачаларнинг гигроскопик хусусиятларга эга бўлиб, ўлчами катталашиши ва натижада ўлчов асбоблари томонидан фаолроқ қайд этилиши билан изоҳланади. Шунингдек, ёғингарчиликдан кейин намликнинг буғланиши иккиламчи аэрозоллар ҳосил бўлишини кучайтириши мумкин. Шамол бўлмаган ҳолатда ифлослантирувчи моддалар ерга яқин қатламда тўпланишда давом этади”, – дея изоҳ берилади хабарда.

​“Ўзгидромет” вазият доимий мониторинг қилинаётганини, маълумотлар аниқлаштирилгани сўнг қўшимча ахборот тақдим этилишини билдирган.

• Ifloslanish
• Ўзгидромет
• yomg‘ir