Покистон ҳукумати собиқ ташқи ишлар вазири, мухолиф “Адолат учун ҳаракат” раҳбари Шоҳ Маҳмуд Қурайшийни ҳибсга олди. Сиёсатчининг ҳибсга олиниш сабаби ҳозирча очиқланмаган.

Қурайший август ойи бошида Исломобод суди томонидан коррупцияда айбланиб, уч йиллик қамоққа ҳукм қилинган Имрон Хондан кейин партияга бошчилик қилиб келаётган эди.

Тергов идораларининг ўтган йилги мурожаатига биноан, Хонга нисбатан Яқин Шарқ давлатлари етакчилари томонидан берилган совғалар сотуви билан боғлиқ ноқонуний ҳаракат – фирибгарлик ва ҳужжатларни сохталаштириш айблови қўйилган.

Тергов давомида собиқ ҳукумат раҳбари ва турмуш ўртоғи томонидан давлат хазинасидан камида 52 та совға ўзлаштирилгани аниқлангани айтилган. Буюмларнинг бозор қиймати жами 154 рупий, тахминан икки миллион долларни ташкил қилган. Бу эса унга нисбатан жиноий иш қўзғатишга асос бўлган.

Имрон Хон эса барча айбловларни рад этган.

Собиқ ҳукумат раисига нисбатан юздан зиёд бошқа айбловлар орасида шуниси энг катта шов-шувга сабаб бўлган.

Хонга ишончсизлик билдирилганидан кейин, у 2022 йил 10 апрель куни Вазирлар Маҳкамаси раиси лавозимидан четлаштирилган эди.

• Imron Xon
• Покистон