Португалияда яшовчи Боби лақабли ит тарихдаги ўз турининг энг кекса вакили сифатида Гиннеснинг рекордлар китобига киритилди. “Sky news” хабарига кўра Боби ҳозирда 30 ёшу 268 кунлик.

Алентежу мастифи (ит тури) 1992 йил 11 майда туғилган ва деярли бутун умрини Португалиянинг ғарбий соҳилидаги Кокейрос қишлоғида ўтказган. Унинг ёши Лейрия муниципалитетининг (ўзини ўзи идора қилувчи орган) ветеринария хизмати ва давлат ветеринария маълумотлар базасининг ёзувлари билан тасдиқланган.

Итнинг эгаси Лиунель Коштанинг Гиннес рекордлар китоби мутахассисларига айтишича, кучукча Боби мўъжизавий тарзда ўлимдан қутулиб қолган. Унинг ака-укалари туғилгандан кейин дарҳол чуқурга тириклайин кўмилган, чунки аллақачон оилага тегишли жуда кўп итлар бўлган. Бобини кейинчалик Лиунель ва унинг укаси кўзлари очилгунча катталардан яширган, шундан кейин маҳаллий одатга кўра, кучуклардан қутулишнинг иложи бўлмаган.

Бобининг эгаси сўзларига кўра, у ҳеч қачон занжир ёки боғични билмаган ҳовли ити бўлган, у бошқа ҳайвонлар, жумладан мушуклар билан яхши тил топишади, ҳалигача эса жуда очиқ ва дўстона. Кексалик туфайли ит кўриши ёмонлаша бошлаган ва сўнгги пайтларда кўп дам олади. 2018 йилда Боби нафас олиш муаммолари туфайли ҳайвонлар касалхонасига ётқизилиши керак эди. Алентежу шаҳрида яшовчи мастиф итларнинг ўртача умр кўриш муддати 12-14 йил, аммо Коштанинг сўзларига кўра, Бобининг онаси 18 йил яшаган, итларнинг яна бири 22 ёшга этган.

Рекордлар китобидан олдинги узоқ умр кўрган рекордчи Австралия жануби-ғарбидаги Виктория штатида 29 йил яшаган ва 1939 йилда оғир касаллик туфайли эвтаназия (аҳволи оғир узоқ вақт сурункали касалликлар билан оғриб келаётган беморларда маълум восита ва ҳаракатлар орқали ўлимни тезлаштириш) қилинган чўпон ит Блью эди. Унинг ёши ҳам ҳужжатлар билан тасдиқланган.

Гиннеснинг рекордлар китоби бу одамлар ва ҳайвонларнинг рекорд даражадаги ютуқлари, ноёб табиат ҳодисалари, шоу-бизнес, оммавий ахборот воситалари ва маданиятнинг ажойиб ютуқлари ҳақидаги маълумотларни очиб берувчи йиллик қўлланма.

Биринчи марта 1955 йилда Ирландиянинг Гиннес пиво компаниясининг буйруғи билан нашр этилган. Бу ғоя Ирландия ва Британия пабларига ташриф буюрувчилар учун у ёки бу ҳодисанинг қайд этилиши бўйича ўзаро келишмовчиликларни ҳал қилиш учун нуфузли манба яратиш ғояси билан чиққан Хью Биверга тегишли эди.

• Гиннес
• Португалия
• рекорд