Бекободда бўлиб турган Президент Шавкат Мирзиёей Ўзбекистон металлургия комбинатидаги янги лойиҳалар билан ҳам танишди.

Шаҳарнинг иқтисодий-ижтимоий ривожида Ўзбекистон металлургия комбинатининг ўрни катта. Унинг таркибида ўнлаб корхоналар, ижтимоий муассасалар борлиги айтилиб комбинатда 11 минг киши ишлаши таъкидланди.

Шу боис унинг фаолиятини кенгайтиришга алоҳида эътибор қаратилмоқда дейилади хабарда. Сўнгги йилларда қатор инвестиция лойиҳалари амалга оширилган, янги цехлар ишга туширилиб олдингилари модернизация қилинганлиги айтилди.

Улардан бири навли прокат мажмуаси бўлиб қарийб 5 миллион долларлик лойиҳа эвазига бу ерга хориждан термо-мустаҳкамлаш линияси келтирилиб, жорий йил февралда ишга туширилган, бу орқали йилига 500 минг тонна А500-А800 маркали арматура ишлаб чиқариш қуввати яратилган.

Давлат раҳбари комбинатга ташрифи чоғида ушбу мажмуани кириб кўрди, лойиҳанинг иқтисодий самарадорлиги билан қизиқди.

Аввало, термо-мустаҳкамлаш жараёнида кимёвий моддалар тежалгани ҳисобига арматура таннархи камайган. Йилига 300 миллион долларлик импорт ўрнини тўлдириш ҳисоб-китоб қилинган.
Яна бир муҳим жиҳати, бу арматура халқаро ДИН стандарти сертификатини қўлга киритган. Энди ушбу маҳсулотни Европага экспорт қилиш режалаштирилган.

Президент комбинатдаги яна бир муҳим лойиҳа - Қуюв прокат мажмуасининг қурилиш майдонида бўлди.

672 миллион евролик ушбу лойиҳа натижасида йилига 1 миллион тонна пўлат листлар ишлаб чиқариш йўлга қўйилади. Мазкур лойиҳа ишга тушгач, комбинат қувватлари 2 бараварга ошиши айтилган.
Бугунги кунда мажмуа учун темир йўл ва автомобил йўли қурилиши якунланиб, темир-бетон конструкциялари ўрнатилмоқда. Италиянинг "Danieli" компанияси томонидан зарур ускуналар келтирилмоқда. Уни 2024 йилда ишга тушириш режалаштирилган.

Давлатимиз раҳбари буни жадаллаштириш ва корхонани кафолатланган хомашё билан таъминлаш зарурлигини таъкидлади.

Ўз вақтида бу комбинат учун 800-900 минг тонна иккиламчи қора металлни қайта ишлаш етарли эди. Лекин бугунги кунда иқтисодиётимизда қора металлга бўлган талаб 4 миллион тонна. Унинг ҳам 50 фоизи импорт ҳисобидан қопланмоқда. Шунинг учун бу корхонани тезроқ ишга туширсак, иқтисодиётимизга катта манфаат беради, - деди Шавкат Мирзиёев.

Давлат раҳбари ушбу лойиҳада иштирок этаётган Туркиянинг "Renaissance Heavy Industries" ва Италиянинг «Даниели» компаниялари раҳбарлари билан ҳам суҳбатлашди.