Пхеняннинг ядровий зарбаси Қўшма Штатлар ва Корея Республикасининг жавоб "ҳал қилувчи ҳаракатларига" сабаб бўлади ва КХДРда "режимнинг тугашига" олиб келади. Бу ҳақда Корея Республикаси президенти Юн Сек Ёл Associated Press агентлигига берган интервьюсида айтиб ўтди.

“Мамлакатларимиз Шимолий Кореянинг ядро қуролидан фойдаланган ҳолда ҳар қандай ҳужумига тезкор, ҳалокатли ва қатъий жавоб қайтарилишини, бу режимнинг барҳам топишига олиб келишини яна бир бор тасдиқлади”, – деди Жанубий Корея раҳбари.

"Келажакда Американинг “кенг қамровли жиловлаши” Корея Республикаси ва Қўшма Штатлар ўзаро муҳокама қиладиган қўшма тизимга айланади. Биз Шимолий Кореядан келадиган ҳар қандай ядро ва ракета таҳдидларини олдини олиш ва уларга жавоб бериш қобилиятини кучайтирамиз”, дея қўшимча қилди Юн Сек Ёл.

“Кенг қамровли жиловлаш” тизими Вашингтоннинг иттифоқчини ҳимоя қилиш учун барча воситалардан, жумладан, ядровий қуролдан фойдаланишга тайёрлигини билдиради.

Апрель ойидаги саммитдан сўнг, АҚШ ва Жанубий Корея президентлари Жо Байден ва Юн Сек Ёл Вашингтон декларациясини қабул қилишди, унда иттифоқчига қилинадиган ташқи зарбани олдини олиш салоҳиятини намойиш этишга қаратилган қатор қадамлар санаб ўтилган. Улар орасида ядровий режалаштириш бўйича маслаҳат гуруҳини яратиш, Корея ярим ороли жанубида Америка стратегик қуролларининг пайдо бўлиш частотасини ошириш ва қўшма машғулотларни кенгайтириш киради.

• АҚШ
• Janubiy Koreya
• Шимолий Корея
• Ядровий қуроль