Аввалроқ, Қашқадарёда асраб олган 13 ёшли қизини зўрлаган эркакка нисбатан жиноят иши қўзғатилгани ҳақида хабар берилган эди. Олий суд матбуот хизматининг маълум қилишича, унга суд ҳукми ўқилган.

Қайд этилишича, иш жиноят ишлари бўйича Чироқчи туман судининг раиси А.Ташев раислигида Жиноят-процессуал кодексининг 19-моддаси (судда жиноят ишларининг ошкора кўрилиши) талабларига мувофиқ ёпиқ суд мажлисида кўриб чиқилган.

К.Т. Жиноят кодексининг 118-моддаси (номусга тегиш) 3-қисми “а” банди ва эски таҳрирдаги (2023 йил 11 апрелга қадар амалда бўлган) 129-моддаси (ўн олти ёшга тўлмаган шахсга нисбатан уятсиз-бузуқ ҳаракатлар қилиш) 2-қисмида назарда тутилган жиноятларни содир қилганликда айбли, деб топилиб, унга Жиноят кодексининг 59-моддасига (бир неча жиноят содир этганлик учун жазо тайинлаш) асосан 12 йил муддатга озодликдан маҳрум қилиш жазоси тайинланди. Тайинланган жазони умумий тартибли колонияларда ўташ белгиланган.

Биринчи инстанция судининг ҳукмидан норози тарафлар қонунчиликда белгиланган тартиб ва муддатда Қашқадарё вилоят судининг жиноят ишлари бўйича аппеляция инстанцияси судлов ҳайъатига шикоят бериши ёки протест келтириши мумкинлиги таъкидланган.

Шунингдек, Олий суд матбуот хизматининг эслатишича, Жиноят кодексининг 73 ва 74-моддалари талабларига мувофиқ ўн саккиз ёшга тўлмаган жабрланувчининг номусига текканлик ҳамда ўн олти ёшга тўлмаган шахсга нисбатан уятсиз-бузуқ ҳаракатлар қилганлик учун ҳукм қилинган шахсларга нисбатан жазодан муддатидан илгари шартли равишда озод қилиш ва жазони енгилроғи билан алмаштириш қўлланилмайди.

• ИИБ
• Жиноят
• Олий суд
• Qashqadaryo