Қашқадарё вилоятида ўзга аёлнинг фотосуратларини тарқатиб юбормаслик эвазига 10 миллион сўм талаб қилган йигитга нисбатан жиноят иши қўзғатилди. Бу ҳақда Киберхавфсизлик хизмати хабар бермоқда.

Яккабоғ туманида яшовчи 20 ёшли (аёл) Ш.А. ариза билан мурожаат қилиб, номаълум шахс томонидан қўнғироқ орқали таҳдид қилиниб, шахсий маълумотларини тарқатмаслик эвазига пул талаб қилинаётганилигини маълум қилган.

Ўтказилган тезкор-қидирув тадбирлари натижасида, товламачилик йўли билан Ш.А.нинг пулларини ўзлаштирмоқчи бўлган қонунбузар Қашқадарё вилояти Яккабоғ туманида яшовчи 22 ёшли (эркак) Б.Ҳ. эканлиги аниқланган.

Унга кўра Б.Ҳ. аёлга қўнғироқ қилиб, унинг бошқаларга кўрсатиб бўлмайдиган, уятли фото ва видеотасвирлари мавжуд эканлиги ва уларни ижтимоий тармоқларда тарқатиб юбормаслик учун 10 млн. сўм миқдорида пул талаб қилган ва тезкор тадбирлар давомида келишилган пулларни олаётган вақтда жиноят устида қўлга олинган.

Б.Ҳ.га нисбатан Ўзбекистон Республикаси ЖКнинг 165-моддаси 1-қисми билан жиноий иш қўзғатилган.

Қонунга мувофиқ, бундай турдаги жиноий ҳаракатлар учун 3 йилдан 5 йилгача озодликдан маҳрум қилиш жазоси назарда тутилган.

• Жиноят
• Киберхавфсизлик