Қирғизистон президенти Садир Жапаров жамоат жойларида юзни ёпадиган диний либослар кийишни тақиқловчи қонунни имзолади.

Қирғизистон раҳбарининг таъкидлашича, бу масала жуда баҳсли ҳисобланади. Диний қоидаларга эргашувчилар Жапаровдан қонунни эътироз билдирган ҳолда рад этишни сўрашган бўлса, жамиятнинг яна бир қисми эса уни имзолашни қатъий талаб қилган.

“Жамият аъзолари нотаниш одамларнинг хонадонма-хонадон юриб, эшикларни тақиллатишига қарши. Улар бу кезиб юрган тарғиботчилар ким эканлиги, уларнинг гувоҳномаси бор-йўқлиги, қандай ташкилот ёки йўналишни тарғиб қилаётгани ва бу бизнинг динимизга зид эмаслигини билишни истайдилар”, – деган у.

Ушбу қонун билан, шунингдек, психологик ёки жисмоний зўравонлик орқали диний эътиқодга мажбурлаш, қариялар уйларида, ҳарбий қисмларда ёки жазони ижро этиш муассасаларида диний маросимлар ўтказиш тақиқланади.

Қонуннинг алоҳида бандида жамоат жойларида, давлат ва маъмурий ташкилотларда, мактабгача таълим ва умумий таълим муассасаларида, шунингдек, турар-жой биноларини айланиб чиқиш йўли билан диний адабиётларни тарқатишга тақиқ киритилади.

 “Мен бу масалага оддий фуқаро сифатида эмас, балки мамлакат президенти сифатида ёндашяпман. Биз фақат бугунги кун ёки шахсий манфаатларимиз учунгина яшамаслигимиз керак”, – дея қўшимча қилди Қирғизистон президенти.

• Қирғизистон
• Қонун
• Sadir Japarov
• тақиқ