Қирғизистон Республикасининг Ала-Бука тумани (Жалолобод вилояти) Кўктош ҚФЙ Яйлов қўмитаси раиси Ўзбекистон фуқаросининг аризасига кўра, товламачиликда гумонланиб ҳибсга олинди. Бу ҳақда УКМК ахборот хизмати хабар берди.

“Ала-Бука тумани (Жалолобод вилояти) Кўктош ҚФЙ Яйлов қўмитаси раиси К.у.К. Ўзбекистон фуқароларига тегишли 9 бош қорамолни ноқонуний ушлаб, эгаларига қайтариш учун 2000 доллар пул талаб қилган. Ўзбекистон фуқароси раисга нисбатан чора кўришни сўраб Қирғизистон Миллий хавфсизлик қўмитасига мурожаат қилган”, – дейилади хабарда.

Шундан сўнг, К.у.К. талаб қилинган пулнинг бир қисми – 1000 долларни олаётган вақтида ушланиб, икки ой муддатга махсус хизматнинг Жалолобод вилояти бўйича бош бошқармаси тергов марказига жўнатилган.

Мазкур ҳолат юзасидан Қирғизистон Республикаси Жиноят кодексининг 208-моддаси 2-қисми 4-банди (“Товламачилик”) асосида жиноий иш қўзғатилган.

• Коррупция
• Пора
• Қирғизистон