Чеченистон раҳбари Рамзан Қодиров фахрий журналист сифатида эътироф этилган. У бу ҳақда ўзининг Telegram саҳифасида маълум қилди.

Грозний шаҳрида Аҳмад-Ҳожи Қодиров хотирасига бағишланган “Олтин қалам” халқаро журналистик мукофотни топшириш маросимида Чеченистон раҳбарига “ОАВ соҳасини ривожлантириш учун зарур шарт-шароитлар яратгани” ва “Журналистлар ҳамжамиятини жаҳон миқёсида қўллаб-қувватлаётгани учун” эсдалик совғаси топширилган.

Тадбирда, шунингдек, Қодиров таниқли журналистларга мукофотлар топширган. Россия давлат телерадиокомпаниясининг ҳарбий мухбири Александр Сладков мукофотнинг гран-присини қўлга киритган. Рамзан Қодиров ҳарбий мухбир ва Донецк давлат телерадиокомпанияси директори Андрей Руденкога “Чеченистон Республикасида хизмат кўрсатган журналист” фахрий унвонини топширган.

Маълумот учун, Аҳмад-Ҳожи Қодиров номидаги мукофот ҳар йили энг иқтидорли ва ўзига хос санъат асарларини яратган ва маданият соҳасидаги ижодий лойиҳаларни амалга оширган соҳа вакиллари учун берилади.

• Chechiniston
• Мукофот
• Ramzan Qodirov