Охирги 4 йил ичида Қозоғистонда психотроп дориларнинг айланмаси 10 баробар ошган. Мамлакат Марказий Осиёда гиёҳванд моддалар ишлаб чиқариш марказига айланди. Бу ҳақда Қозоғистон Ички ишлар вазирлигига таяниб, “Нур.кз” интернет нашри хабар берди.

“Бизнинг “синтетика”миз аллақачон Қирғизистон ва Ўзбекистон “бозорларини” фаол равишда тўлдирмоқда. Бу гиёҳванд моддалар учун жуда қаттиқ жазоларга қарамай амалга ошмоқда. Муаммо кимёвий моддалар ва ускуналардан қонуний фойдаланишдир.

Бунга моддалар, турли реакторлар, конденсаторлар ва буғлантирувчилар киради. Бироқ уларнинг ноқонуний савдоси учун реал жавобгарлик йўқ. Фақат прекурсорлар (мақсадли модданинг шаклланишига олиб келадиган реаксияда иштирок этадиган модда) контрабандаси ва нарколабораториялар учун жиҳозларни сотганлар жиноий жавобгарликка тортилади”, — деди ИИВ раҳбари ўринбосари Марат Кожаев.

У қонунда белгиланган жазо йўқлиги сабабли ҳуқуқ-тартибот идоралари гиёҳванд моддаларни “тайёрловчилар” товарларни сотишни бошлашини кутишларига тўғри келишини айтди.

“Шу туфайли бугунги кунда кўриб чиқилаётган қонун лойиҳасида прекурсорлар ва кўрсатилган ускуналарнинг ноқонуний муомаласи учун жавобгарлик кучайтирилиши назарда тутилган. Агар ўзгартиришлар қабул қилинса, гиёҳванд моддаларни ноқонуний ишлаб чиқариш 15 йилдан 20 йилгача ёки умрбод озодликдан маҳрум қилиш билан жазоланади”, — деди Кожаев.

• Қонун