Қозоғистон парламентида жамоат жойларида диний либос кийишни тақиқлаш масаласи кўриб чиқилиши мумкин. Бу ҳақда парламент депутати Эрмурат Бапи маълум қилди, деб хабар беради “Tengrinews.kz”.

Депутатнинг сўзларига кўра, жамиятда диний либос кийишни тақиқлаш масаласи долзарб бўлиб қолган.

“Айни пайтда биз учун энг муҳим масала мамлакатимиз миллий манфаатларини, миллий анъаналарни, миллий маданиятни сақлаб қолиш ҳисобланади. Агар ҳозирги вазиятга назар соладиган бўлсак, жамиятимизда қора кийинган қозоқлар кўпайди. Бу вазият бизнинг келажакдаги миллий манфаатларимизга жиддий хавф солади”, — деди Ермурат Бапи.

Депутат таъкидлаганидек, тегишли қонун лойиҳаси парламентнинг бўлажак сессиясига киритилади. “Шунинг учун биз, бир гуруҳ депутатлар, парламентнинг кузги сессиясида шундай қонун лойиҳасини тайёрладик, менимча, у қабул қилингандан сўнг жамиятдаги ҳижоб, ниқоб ва бошқа диний либослар масаласи ҳал бўлади. Ўшанда биз, эҳтимол, қандайдир қилиб диний кийим масаласини тартибга сола оламиз”, — дея хулоса қилди у.

• Қозоғистон
• hijob