Маълум қилинишича, жорий йилнинг 15 сентябрь куни Ўзбекистон Республикаси Қуролли Кучлари академияси ҳарбий илмий-амалий ишлаб чиқиш маркази катта илмий ходими, ҳарбий фанлар номзоди, профессор, истеъфодаги генерал-майор Александр Владимирович Шишлянников оғир касалликдан кейин 73 ёшида вафот этди. Бу ҳақда Ўзбекистон Республикаси Мудофаа вазирлиги матбуот хизмати хабар берди.

А.В.Шишлянников 1950 йил 3 ноябрда Тошкент шаҳрида туғилган. Унинг ҳарбий таржимаи ҳоли ҳақиқий жанговар офицер ва генералнинг йўлидир.

1971 йил Тошкент олий танк қўмондонлик билим юртини тамомлагандан сўнг, Чехословакиядаги Марказий қўшинлар гуруҳи ва Германиядаги Ғарбий қўшинлар гуруҳи қисмларида хизмат қилган. 1993-1995 йилларда Тожикистон Республикаси мудофаа вазири лавозимида фаолият юритган.

У бутун умрини Қуролли Кучлар сафида хизмат қилишга бағишлади.
30 йилдан ортиқ ҳақиқий ҳарбий хизмати давомида Александр Владимирович унинг барча босқичларини босиб ўтди: танк билим юрти курсантидан тортиб, Ўзбекистон Республикаси Қуролли Кучлари академиясининг тезкор санъат ва умумий тактика кафедраси бошлиғигача, Тожикистон Республикасининг биринчи мудофаа вазири, лейтенантдан-генералгача.

Шунингдек, кўп йиллик ҳалол, виждонан хизмати ва меҳнати учун Александр Владимирович юксак давлат мукофотлари, жумладан 3 та орден ва 50 дан ортиқ медал ҳамда эсдалик нишонлари билан тақдирланган. Мамлакатимиз Қуролли Кучларининг жанговар тайёргарлигини оширишдаги хизматлари, ҳарбий фанни шакллантириш ва ривожлантиришга қўшган улкан ҳиссаси учун 2019 йилда Александр Владимирович Шишлянников Ўзбекистон Республикаси Президенти Шавкат Миромонович Мирзиёевнинг фармонига мувофиқ, “Дўстлик” ордени билан тақдирланган.

• Мудофаа
• Қуролли Кучлар
• Тожикистон
• Тошкент