“ДАВР БАНК”га молиявий жарима қўлланилишига сабаб микро қарз бўйича қўшимча шартлар ва муҳим маълумотлар ташқи рекламада кўрсатилмаган. Бу ҳақда Рақобат қўмитаси маълум қилмоқда.  

Ўрганишлар давомида,  “ДАВР БАНК” АТБ томонидан эълон қилинган ташқи рекламаларда “Давр mobile иловасида 50 000 000 сўмгача онлайн микрокредит” мазмунидаги реклама ахбороти берилганлиги кузатилди.

Шундан сўнг ушбу реклама бўйича банкнинг расмий веб-сайти ўрганилганда, микроқарз исталган мақсадларда фойдаланиш учун ажратилиши,  “Давр mobile” иловаси орқали расмийлаштирилиши, қарз олувчи камида охирги 6 ой давомида доимий иш жойига ҳамда ойлик даромадга эга бўлган бўлиши лозимлиги кўрсатилган. Шунингдек, микроқарз муддати – 60 ойгача, фоиз ставкаси – 43,00 фоиз, қарз миқдори – 50,0 млн сўм этиб белгиланганлиги аниқланган.

Микро қарз бўйича қўшимча шартлар ва муҳим маълумотлар ташқи рекламада кўрсатилмаган.

Шунингдек, Тошкент шаҳрининг бир қатор кўчаларида жойлашган LED мониторли реклама объектларида “Тадбиркорлар учун 5 миллиард сўмгача кредит, 24 фоиздан” мазмунидаги рекламалар жойлаштирилган.

Мазкур реклама бўйича банкнинг расмий веб-сайти ўрганилганда, кредит асосий воситаларни сотиб олиш учун: муддати – 60 ойгача, фоиз ставкаси – 32,99 фоиз, миқдори – 5 миллиард сўмлиги ҳақидаги маълумотлар кўрсатилган.

Шунингдек, кредит бўйича қўшимча шартлар ва муҳим маълумотлар ташқи рекламада кўрсатилмаган.

Юқоридагиларга кўра, Қўмита Махсус комиссияси томонидан “Реклама тўғрисида”ги ҳамда “Истеъмолчиларнинг ҳуқуқларини ҳимоя қилиш тўғрисида”ги Қонунлар талаблари бузилиш аломатлари юзасидан “ДАВР БАНК” АТБга нисбатан белгиланган тартибда иш қўзғатилиб, натижаси юзасидан молиявий  жарима қўллаш ҳақида қарор қабул қилинган.

• Bank
• Жарима
• raqobat