Борн Ребни томонидан 2008 йилда асос солинган Bellator (аралаш жанг санъати) Лигаси энди йўқ.

Нуфузи жиҳатидан UFC'дан кейин турган промоушен 17 йиллик фаолиятдан кейин расман тугатилди. Бу ҳақда PFL Лигаси раҳбарлари хабар беришди. Айнан PFL 2023 йилнинг ноябрь ойида Bellator брендини “Paramaunt” компаниясидан сотиб олган эди.

“PFL бир йил олдин Bellator ММА лигасини юқори савияли жангчиларга эга эканлиги учун сотиб олганди. PFL бренди аллақачон “ғалаба қозон ва ҳаракатни давом эттир” форматининг синоними ҳамда инновацион маҳсулотга айланиб улгурган. Бундан кейин барча мусобақалар PFL бренди остида ўтказилади. Bellator эса ажойиб тарихи билан эсда қолади”, – деган PFL асосчиси ва ҳозирда унинг бошқарув раиси Донн Девис.

Эндиликда бирлашган тизим PFL Champions Series номидан турнирлар ўтказади. Ҳозирча Bellator чемпионлари ҳисобланган: Усман Нурмагомедов, Патрисио Фрейре, Кори Андерсон сингари жангчиларнинг тақдири номаълумлигича қолмоқда. Улар PFL чемпионлари деб юритилиши ва ёки қайтадан PFL камари учун жанг қилишлари ҳам маълум эмас.

• Беллатор
• MMA