Оттаванинг санкцияларига жавобан Россия 200 нафар канадаликни қора рўйхатга киритиб, уларнинг мамлакатга киришини тақиқлади.

Бу ҳақда Россия Ташқи ишлар вазирлиги баёнотида маълум қилинди.

“Оттава томонидан Россия давлат амалдорлари, ҳарбий хизматчилар, судьялар, ҳуқуқ-тартибот идоралари ходимлари ва жамоат арбобларига нисбатан жорий қилинган индивидуал санкцияларга жавобан, жавоб тариқасида Канаданинг 200 нафар фуқаросига кириш тақиқланди”, — дейилади баёнотда.

Россия Ташқи ишлар вазирлиги, шунингдек, сайтида Россия санкциялари рўйхатига доимий равишда киритилган шахсларнинг фамилияларини эълон қилди. Улар орасида юқори мартабали амалдорлар, нафақадаги ва амалдаги қонунчилар, ҳуқуқни муҳофаза қилувчи органлар ходимлари ва экспертлар ҳамжамияти вакиллари бор.

Ҳаммаси бўлиб, Россия Федерациясига кириши доимий тақиқланган Канада фуқаролари рўйхатига 1204 исм киритилган.

Аввалроқ, жума куни Канада ҳукумати Россия, Эрон ва Мянма жисмоний ёки юридик шахсларини “инсон ҳуқуқларини тизимли равишда бузганлик”да айблаб, қўшимча санкциялар жорий қилган эди.

• АҚШ
• Канада
• Россия
• Санкция