Россия Федерацияси Ислом дунёси давлатларининг мустақиллиги ва халқаро ҳуқуқ тамойилларига содиқлигини юксак қадрлайди ва Ислом ҳамкорлик ташкилотига аъзо давлатлар билан муносабатларни мустаҳкамлашга қатъий қарор қилади. Бу ҳақда Россия ташқи ишлар вазири Сергей Лавров Ислом ҳамкорлик ташкилоти бош котиби Ҳусайн Иброҳим Таҳа билан учрашув чоғида айтиб ўтди.
“Россия ва Ислом сивилизацияси давлатлари узоқ йиллик ишончли шериклар бўлиб, хавфсизлик, барқарорликни таъминлаш, иқтисодий муаммоларни ҳал этишда ҳамкорлик қилмоқда... Биз ИҲТ давлатлари билан барча соҳаларда ҳамкорлигимизни янада мустаҳкамлаш, сизнинг ижтимоий-иқтисодий муносабатларингизга, сиёсий тузилмалар ва анъанавий маънавий-ахлоқий қадриятларингизга ҳурмат билан қарашни мақсад қилганмиз”,– дейди у.
Лавровнинг қўшимча қилишича, Россия “Ғарбнинг бир томонлама ҳаракатлари билан мураккаблашган” ҳозирги кескин вазиятда ўз мустақиллигига путур етказмайдиган ва халқаро ҳуқуқ тамойилларига содиқ қолган Ислом дунёси давлатларининг мустақил позициясини юксак қадрлайди.
Ўз ўрнида Ислом ҳамкорлик ташкилоти бош котиби Ҳусайн Иброҳим Таҳа ҳам Россия мусулмон давлатлари учун муҳим ҳамкор эканини таъкидлаган.
“Россия бизнинг эски дўстимиз, муносабатларимизнинг бугунги ҳолатини кўриш учун бугун бу ерга келиш имконига эга бўлганимдан жуда хурсандман. Биз июнь ойида учрашганимизда вазият анча мураккаб эди, аммо ҳозир айтишимиз мумкинки, дунё аста-секин нима бўлаётганини тушуна бошлади. Ҳозир эса бу Россияга дўстлигимизни ва муносабатларимизни янада ривожлантириш зарурлигини аниқ ифодалашимиз учун ажойиб вақт, деб ҳисоблайман”,–дейди ИҲТ Бош котиби.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!