Маълумотларга кўра, Перу президенти Дина Болуартенинг уйи ва давлат раҳбарининг қароргоҳида эълон қилинмаган ҳашаматли “Rolex” соатлари коллекцияси иши бўйича тинтув ўтказилди. Бу ҳақда бош вазир Густаво Адрианзен маълум қилди.

Маълум қилинишича, Перу прокуратураси ва алоҳида мураккаб ишлар бўйича тергов бўлими полиция ходимлари президент қароргоҳига маҳаллий вақт билан соат 4:29 да бош судьянинг буйруғи билан келган.

Нашрнинг ёзишича, прокуратура вакилларига эшик очилмагани учун полиция эшикни синдиришга мажбур бўлган. Болуарте бўлмасада, унинг адвокатлари у ерда эди.

Прокурор Халви Колчадо журналистларга қароргоҳда тинтув махфий тарзда ўтказилишини айтди.
“Кейинроқ прокуратура мусодара қилинган ашёлар бўйича маълумот беради”, - деди у.

Эслатиб ўтамиз, аввалроқ Перу Бош прокуратураси президент Болуартенинг ноқонуний бойитилиши, шунингдек, декларация қилинмаган қиммат соатларга эгалиги юзасидан Олий судга сўров юборган эди.

• Жаҳон
• Президент