Самарқанд вилояти ИИБнинг маълум қилишича, 2024 йил 23 июль куни соат 17:30 ларда Самарқанд шаҳар Сиёб маҳалласида яшовчи фуқаро навбатчилик қисмининг 102 қисқа рақамига мурожаат қилиб, Оқдарё тумани “Наврўз” маҳалласи Зарафшон кўчасида жойлашган кўп қаватли уйлар олдида нотаниш фуқаролар унга тегишли Nexia-3 русумли автомашинасининг ойналарини синдириб, ўзини уриб, тан жароҳати етказганлигини маълум қилган.

Ушбу чақирувга асосан Оқдарё тумани ички ишлар бўлими инспектори катта лейтенант Ўткир Бурқиeв воқеа жойига етиб борган. Жанжал қилган фуқароларни эса “Наврўз” маҳалласида жойлашган хизмат хонасига олиб борган. Шундан сўнг ҳолатга аниқлик киритиш мақсадида мурожаат қилган фуқаро билан суҳбатлашиб турган вақтида ҳуқуқбузарлар 35 ва 19 ёшли йигитлар ҳамда 45-50 ёшлар атрофидаги аёл “нима учун хизмат хонасига биринчи бизни киритмайсан, биз ҳам 102 рақамига мурожаат қилганмиз”, дея жанжал кўтаради. Инспектор ишига халал бермай туришини, навбат билан гаплашишини айтган вақтида улар ходимни ҳақоратли сўзлар билан сўкиб, хонадан чиқиб кетади.

Инспектор уларга кетиб қолмаслигини, қолаверса ҳолат бўйича тушунтириш хатлари олиши лозимлигини айтган вақтида, аёл киши келиб ходимнинг кийимидан тортиб қаттиқ ҳақоратлайди. Ғазаби қайнаган икки эркак муштига зўр бериб, профилактика инспекторини уриб-тепади ва йиқитиб танасининг турли жойларига тан жароҳати етказади.

Воқеадан сўнг учала фуқаро ҳам ўзларига тегишли бўлган автомашинага ўтириб, воқеа жойидан кетади.

Ҳозирда ҳолат юзасидан Оқдарё туман прокуратураси томонидан жиноят иши қўзғатилиб, 3 нафар гумонланувчилар процессуал тартибда қамоққа олинган.

• ИИБ
• Janjal
• Самарқанд