Хабар берилишича, АҚШ Сенати “Оne Big Beautiful Bill” номли солиқлар ва бюджет харажатларига оид кенг қамровли қонун лойиҳасини минимал овоз устунлиги билан маъқуллади.

50 нафар сенатор уни маъқуллаб, 50 нафари эса қарши овоз берган. Қонун тарафдорлари ва қаршилари сони тенглашгач, ҳал қилувчи овозни Сенат раиси вазифасини бажарувчи витсе-президент Жей Ди Венс берди, шу тариқа ҳужжат қабул қилинди.

Энди қонун лойиҳасига овоз бериш навбати Вакиллар Палатасига етиб келди. Қонуннинг асосий ғояси — юқори даромадли шахслар ва компаниялар учун солиқ имтиёзларини жорий этиш ҳисобланади. Бюджет бунга йўл қўйиши учун ижтимоий харажатларни кескин қисқартириш режалаштирилган. Бу эса демократлар томонидан кескин норозиликка сабаб бўлмоқда.

Бироқ бир қатор республикачилар ҳам қонунни танқид қилмоқда — улар харажатлар қисқартилиши етарли эмас деб ҳисоблашмоқда. АҚШ Конгресси бюджет мутахассисларининг огоҳлантиришича, “Ягона, катта ва гўзал” қонун лойиҳаси 10 йил ичида АҚШ бюджет тақчиллигини 3 триллион доллардан кўпроққа ошириши мумкин.

• АҚШ
• Қонун
• Сенат
• Трамп