Маск Х платформасида президент Доналд Трампнинг номи молиячи Жеффри Эпштейн ишига доир ҳужжатларда қайд этилгани сабабли, бу ҳужжатлар ҳанузгача оммага эълон қилинмаганини ёзди.

Жеффри Эпштейн вояга етмаганларга нисбатан жинсий характердаги жиноятларда айбланган эди.

“Маск менга бир неча ой олдин қарши чиқиши керак эди. Мен таклиф қилаётган бюджет бўйича қонун лойиҳаси кўплаб афзалликларга эга. Мен олдинги маъмуриятнинг хатоларини тузатмоқдаман”, — деб ёзди АҚШ президенти.

Бундан ташқари, Маск Трампнинг SpaceX билан тузилган давлат шартномалари бекор қилиниши ҳақидаги гаплари ортидан ўзининг Dragon космик кемаларини дарҳол эксплуатациядан чиқаришни бошлашини билдирди. Аммо орадан бир неча соат ўтиб, у бу фикридан қайтганини маълум қилди.

Шунингдек, Маск Х'да бир фойдаланувчининг твитини репост қилди. Унда “Трамп ва Маск можаросида мен Маск тарафидаман” деб ёзилган эди. Твитда, шунингдек, Трампга импичмент эълон қилиниши, АҚШ витсе-президенти Жей Ди Венс эса унинг ўрнини эгаллаши кераклиги қайд этилганди. Маск бу постга “Ҳа!” деб жавоб берди.

Шу билан бирга, Маск Трамп жорий қилаётган савдо тарифлари жорий йилнинг йилнинг иккинчи ярмидаёқ Қўшма Штатларда иқтисодий инқирозга олиб келишини билдирди.

Маск Х платформасида Қўшма Штатларда “учинчи сиёсий партия” тузиш зарурлиги бўйича сўровнома ҳам жойлаштирди. Сўровномада аллақачон 740 минг киши қатнашди ва уларнинг 83 фоизи “Учинчи партия” ташкил этилишини қўллаб-қувватлади.

“Трамп президент сифатида яна 3,5 йил қолади, мен эса бу ерда яна 40 йилдан ортиқ қоламан”, — деб ёзди Tesla раҳбари сўровнома остида.

Трамп ва Маск ўртасидаги можаро ортидан Илон Маскка тегишли Tesla компанияси акциялари нархи 15 фоизга тушиб кетди, Доналд Трампнинг TMTG медиакомпанияси акциялари қиймати эса 8 фоизга пасайди.

• АҚШ
• Акция
• Ilon_Mask
• Tesla
• Трамп