Саудия Арабистони Африка мамлакатлари билан нефть қазиб олиш квоталари миқдорини камайтириш бўйича музокаралар олиб боришга ҳаракат қилмоқда. Бу ҳақда The Wall Street Journal ўз манбаларига таяниб хабар берди.

“Саудия Арабистони кичик африкалик ишлаб чиқарувчилардан квоталар камайтиришни талаб қилди. Шу билан бирга, қироллик гуруҳнинг нуфузли аъзоси бўлган Бирлашган Араб Амирликлари (OPEC ва OPEC+) билан ҳамкорлик қилиш ва ишлаб чиқариш ҳажмини ошириш имкониятини муҳокама қилмоқда”, – дейилади хабарда.

Қайд этилишича, Саудия Арабистони Энергетика вазири шаҳзода Абдулазиз бин Салмон 3 июнь, шанба куни баъзи африкалик делегатларни Венадаги меҳмонхонасига таклиф қилган ва уларга ишлаб чиқариш квоталари қисқартирилиши кераклигини айтган. Қайд этилишича томонлар учрашувни келишувсиз тарк этишган.

Якшанба куни Венада OPEC+ давлатларининг бир қатор учрашувлари бўлиб ўтади, унда нефть бозоридаги вазият ва ишлаб чиқаришни чеклаш бўйича келишув келажаги муҳокама қилинади. Бир кун аввал OPEC конференцияси йиғилиши бўлиб ўтди. Эрон нефть вазири ўринбосари Амир Ҳусайн Заминиянинг журналистларга маълум қилишича, ташкилот давлатлари унда нефт қазиб олишни қисқартириш вариантларини муҳокама қилмаган, чунки бу бутун OPEC+ алянси йиғилишининг мавзуси ҳисобланади.

Дастлаб нефть келишуви шартларида ҳеч қандай ўзгаришлар кутилмаган бўлса-да, Reuters нашри OPEK+ бошқа вариантлар қаторида ишлаб чиқаришни кунига қўшимча 1 миллион баррелга қисқартириш масаласи муҳокама қилинаётганини айтди.

OPEC+ давлатлари келишув доирасида 2023 йил охиригача нефть қазиб олишни кунига 2 миллион баррелга қисқартирмоқда. Шу билан бирга, апрель ойида алянсга аъзо қатор давлатлар, жумладан, Саудия Арабистони ҳам май ойидан бошлаб квотадан ортиқ қазиб олишни йил охиригача ихтиёрий равишда кунига 1,16 миллион баррелгача қисқартиришни эълон қилди.

• Afrika
• Саудия Арабистони
• нефть