Маълумотларга кўра, Саудия Арабистони бозор талабининг пастлиги фонида барча минтақалар, жумладан, Осиёдаги харидорларга февраль ойида нефть етказиб бериш нархини пасайтиришга қарор қилди. Бу ҳақда “Bloomberg” хабар берди.

Маълум қилинишича, Saudi Aramco давлат компанияси Осиёга етказиб бериладиган асосий Arab Light бренди учун нефть нархини бир баррел учун 1,5-2 долларга пасайтирди. Saudi Aramco шунингдек, шимоли-ғарбий Европа, Ўрта Ер денгизи ва Шимолий Америкага февраль ойи учун етказиб бериш нархларини пасайтирди.

Bloomberg’нинг қайд этишича, февраль ва март ойларида нефть истеъмоли камайиши кузатилади.

“Ушбу даврда нефтни қайта ишлаш заводлари режали техник хизмат кўрсатиш учун ёпилади”, — дейилади хабарда.

Нархларни пасайтириш тўғрисидаги қарор Америка нефтини етказиб беришнинг кўпайиши ҳисобига таклифнинг ортиқча бўлиши хавфи фонида қабул қилинган. S&P Global Commodity Insights маълумотларига кўра, ОПЕК+ мамлакатлари экспорт ҳажмини қисқартириши фонида, ўтган йил охирига келиб АҚШ нефть қазиб олиш бўйича жаҳон рекордини ўрнатишга яқин эди.

2023 йил ноябрь ойи охирида ОПЕК+ давлатлари келишувга эришди, унга кўра Саудия Арабистони нефть экспортини ихтиёрий равишда 1 миллион баррелга, Россия эса 500 минг баррелга кўпайтиради, ташкилотнинг қолган давлатлари эса биргаликда нефть экспортини бир неча баробарга (500 минг баррелга) қисқартиради. Шартнома мартгача амал қилади.

• Саудия Арабистони
• нефть