Ўзбекистонда 2023 йилнинг сентябрь ойида инфляция 1,24 фоизни ташкил этди. Бу ҳақда Статистика агентлиги маълумот берди.

Бу сўнгги уч йил ичида ушбу ойдаги энг юқори кўрсаткич (2021 йил – 1,09 фоиз, 2022 йил – 1,03 фоиз), шунингдек, 2023 йил бошидан буён энг катта ўсишдир.

Ўтган ойда озиқ-овқат маҳсулотлари ўртача 1,8 фоизга, ноозиқ-овқат маҳсулотлари 1 фоизга, хизматлар 0,6 фоизга қимматлашган.

Йил бошидан (январь-сентябрь) инфляция 5,13 фоизгача ошган, йиллик инфляция (ўтган йилнинг сентябрь ойига нисбатан) 9,19 фоизга (8,96 фоиз) тезлашган. Йил давомида озиқ-овқат маҳсулотлари ўртача 11 фоизга, ноозиқ-овқат маҳсулотлари 7,6 фоизга, хизматлар 8,2 фоизга қимматлашган.

Шунингдек, ўтган бир ой ичида қатор ҳудудларда уй-жой ижараси тўловлари ошди (республикада ўртача 2,4 фоизга).

Сентябрь ойида умумий овқатланиш хизматлари нархи тўққизта вилоятда ўртача 0,1 фоиздан 2,5 фоизга (август ойида 0,3 фоиздан 5,3 фоизгача) қимматлашган.

Бир қатор ҳудудларда палов индекси ўзгарди. Бир порция палов нархи Бухоро вилоятида 11,9 фоизга (28,2 минг сўмгача), Самарқанд вилоятида 7,3 фоизга (27 минг сўм) ошди. Навоий ва Қашқадарё вилоятларида ҳам таом қимматлашган (2 фоиз ва 1,6 фоиз).

• oziq-ovqat
• статистика