Шаҳрисабз туманининг Ғелон қишлоғи пурвиқор тоғлар бағрида жойлашган сўлим гўша ҳисобланади. Ҳудуднинг табиати йилнинг ҳамма фаслларида ҳам ажойиб ва фусункор. Шу боис қишлоқни ўраб турган тоғларда экотуризмни ривожлантириш учун юқори салоҳият ва имконият мавжуд.

Ўзбекистон президентининг 2024 йил 5 декабрда “Ғелон” туристик-рекреацион зонасини ва халқаро умуммавсумий курортни ташкил этиш чора-тадбирлари тўғрисида”ги қарори қабул қилинди. 

Қарорга кўра, тўғридан-тўғри хорижий инвестиция маблағлари ҳисобига Қашқадарё вилояти Шаҳрисабз туманидаги олис тоғли Ғелон қишлоғи ҳудудида 2030 йилгача босқичма-босқич “Ғелон” туристик-рекреацион зонасини ва халқаро умуммавсумий курортни ташкил этилиши белгиланган.

Вилоят туризм ва маданий мерос бошқармаси берган маълумотларга кўра, қарор ижроси доирасида ишлар аллақачон бошлаб юборилган. Хусусан, берилган топшириққа асосан инвестиция лойиҳасини амалга ошириш белгиланган қарийб 3 минг гектарга яқин ер майдонининг бошланғич нархи, дарахтзорларга етказилган зарар ўрнини қоплаш, сўнгги 5 йилда тушган ҳамда кейинги ўн йилликда тушадиган солиқ тушумлари тўғрисида маълумотлар тайёрланган. 

“Ғелон” туристик-рекреацион зонаси дирекциясини ташкил этиш юзасидан вилоят ҳокими қарор лойиҳаси белгиланган тартибда тизимга юкланган.

Юқоридагиларга қўшимча тарзда, инвестор томонидан инвестиция лойиҳаси доирасида амалга ошириладиган инфратузилма объектларини босқичма-босқич ишга тушириш тўғрисидаги маълумотлар билан умумлаштирилиб 2025 йилнинг 10 февралида бирламчи тақдимот лойиҳасини тақдим этиш режалаштирилмоқда.

Бундан ташқари, Шавкат Мирзиёевнинг 2024 йил 5 июндаги тегишли қарорига асосан Шаҳрисабз тумани Ҳисорак қишлоғидан Ғелон қишлоғигача, Ҳисорак қишлоғидан Сарчашма қишлоғигача бўлган йўлларни 33 километрини, Ғелон қишлоғидаги туризм объектларининг муҳандислик-коммуникация тармоқларини яхшилаш белгиланган. 

Шунингдек, электр, ичимлик ва оқова сув тармоқлари қуриш бўйича ҳам тендер танловлари ўтказилиб, ғолиб бўлган ташкилотлар томонидан қурилиш ишлари бошланган. 

Бу каби йирик лойиҳаларнинг амалиётга татбиқ этилиши, келгусида Ғелон қишлоғи ҳудудида шинам меҳмонхоналар, савдо мажмуалари, тамаддихоналар, экстремал саёҳат қилиш имкониятлари яратилишига, энг муҳими ҳудудда минглаб янги иш ўринлари ташкил этилишига хизмат қилиши билан аҳамиятлидир.

• Курорт
• Qashqadaryo
• Шаҳрисабз
• Янгилик
• qurilish