Таниқли хонанда Шакира ва футболчи Жерар Пикега тегишли бўлган, Каталониянинг Эсплугес-де-Лёбрегат шаҳрида жойлашган ҳашаматли уй сотувга қўйилди. Маълумотларга кўра, уйда иккита улкан ертўла, овоз ёзиш студияси, машғулотлар зали, шунингдек теннис корти ва мини-футбол учун махсус майдонча мавжуд.

Таниқли жуфтлик жорий йилнинг июнь ойида ажрашишга қарор қилган эдилар. Бунга футболчининг хиёнати сабаб бўлган. Жуфтликнинг 9 ёшли Милан ва 7 ёшли Саша исмли ўғиллари айни вақтда Шакира билан бирга Барселонада бўлиб турибди. Хонанда болаларнинг васийлигини олган ва улар билан биргаликда АҚШнинг Флорида штатига кўчиб ўтмоқчи. Жерар Пике эса Испанияда қолишни режалаштиряпти.

Маълумот учун, Шакира ва Жерар Пике муносабатлари 2010 йилда бошланган. Футболчи Шакира томонидан куйланган ва Жаҳон чемпионатининг расмий таронасига айланган “Waka Waka (This Time for Africa)” қўшиғи клипида суратга тушган. Орадан икки йил ўтиб, уларнинг тўнғич ўғиллари Милан, яна икки йилдан кейин эса иккинчи фарзандлари – Саша дунёга келган.

• Ажрим
• Шоу-бизнес
• машҳурлар