Бугун, 30 декабрь куни Қозоғистоннинг Алмати шаҳрида шахматнинг рапид ва блиц йўналишлари бўйича ўтказилган Жаҳон чемпионати ўз якунига етди.

Икки кун давом этган блиц йўналишидаги баҳсларда эркаклар 21 та аёллар эса 17 та турда ўзаро баҳс олиб бордилар. Сўнгги турда жаҳон шахмат тожининг амалдаги эгаси норвегиялик Магнус Карлсен рапид бўйича собиқ жаҳон чемпиони Нодирбек Абдусатторовни мағлубиятга учратди ва 16 очко билан жаҳон чемпиони бўлди. Карлсен, шунингдек, рапид йўналишида ҳам Абдусатторовни таслим этган ва якунда барча рақибларини ортда қолдирган эди.

Америкалик Хикару Накамура эса 15 очко билан қўшимча кўрсаткичларга кўра иккинчи ўринни эгаллади. Шунча очко жамғарган арманистонлик гроссмейстер Хаик Мартиросян эса кучли учликка якун ясаб берди.

Ўзбекистонлик шахматчилар орасида энг яхши натижани Нодирбек Абдусатторов қайд этди. У 176 шахматчи орасида 13 очко билан қўшимча кўрсаткичларга кўра 19-ўринни эгаллади. Худди шунча очко жамғарган Жаҳонгир Воҳидов эса 22-поғонани банд этди.

21 имкониятдан 12,5 очко тўплаган Нодирбек Юқуббоев ва 12 очкога эга Муҳиддин Мадаминов 39 ва 40-ўринда қайд этилган. Бундан ташқари, Шамсиддин Воҳидов, Жавоҳир Синдоров, Муҳаммадзоҳид Суяров ва Ҳумоюн Бегмуродов сингари ўзбек шахматчилари ҳам мусобақада мунояиб иштирок этишди.

Аёллар ўртасидаги беллашувларда эса ўзбекистонликлар орасидаги энг яхши натижа Умида Омоновага тегишли бўлди. 16 ёшли шахматчи 17 имкониятдан 10,5 очко жамғарган ҳолда блиц йўналишида 16-ўринни эгаллади. Шунингдек, 9 очкога эга Афруза Ҳамдамова ва ўзбекистонлик 1-аёл гроссмейстер Нафиса Мўминова 37 ва 44-поғонпдп қайд этилган. Ушбу йўналишда Жаҳон чемпиони мезбонлар вакиласи Бибисора Ассаубаева бўлди (17 имкониятдан 13 очко).

• Жаҳон чемпионати
• Магнус Карлсен
• Nodirbek Abdusattorov
• Шахмат