Тошкент шаҳар Мирзо Улуғбек туманидан қизиқчи Шукурулло Исроиловнинг автомобилини олиб қочган ҳақида йигит 2 йил муддатга озодликдан маҳрум қилинди. Бу ҳақда “Миллар” дастурида хабар берилди.

Мазкур иш Жиноят ишлари бўйича Мирзо Улуғбек туман судида кўриб чиқилган. Судда аниқланишича, олиб қочилган автомобиль Исроиловнинг фарзандига тегишли бўлган. Қизиқчи машина олиб қочилганини сезиши билан ички ишлар органларига хабар берган.

Олиб қочилган транспорт воситаси Учтепа тумани Заргарлик кўчасида тўхтатилган. Гумонланувчи фуқаро ва транспорт воситаси жиноий қидирув ходимларига топширилган. Транспорт воситасини 1991 йилда туғилган шахс очиқ қолганидан фойдаланиб, олиб қочиб кетгани аниқланган.

Ҳолат бўйича Жиноят кодексининг 267-моддаси (транспорт воситасини олиб қочиш) билан жиноят иши қўзғатилиб, қамоққа олиш эҳтиёт чораси қўлланилган эди.

Судда қизиқчининг ўғли судланувчига нисбатан даъвоси йўқлигини билдирган. Суд ҳукмига кўра, айбдор Жиноят кодексининг 267-моддаси 1-қисми билан айбдор деб топилган ва айнан ўша модда билан у Жиноят кодексининг 57-моддасини (енгилроқ жазо тайинлаш) қўллаш йўли билан 2 йил муддатга озодликдан маҳрум қилиш жазоси тайинланган.