Суриянинг янги ҳукумати Россия раҳбари Владимир Путиндан собиқ президент Башар Асадни суд жараёни учун экстрадиция қилишни сўради.

Расмий сўров Сурия президенти ва “Ҳайъат Таҳрир аш-Шом” гуруҳи етакчиси Аҳмад аш-Шаръа номидан Москвага юборилган. “Бунгача Башар Асад Москвага юборган маблағларни қайтариш сўралган эди”, – дея хабар бермоқда Reuters.

Россия делегациясининг яқинда Дамашқдаги ташрифида Асадлар оиласининг Россия активларига ҳеч қандай сармояси йўқлиги ҳақида маълумот берилган.

“Ушбу учрашув давомида Сурия вакиллари Асадни мамлакатда суд қилиш учун Москвага топшириш масаласини яна кўтарган”, – деб ёзади Al Arabiya.

Бироқ уч соат давом этган музокаралардан сўнг, Россия томони Асадни экстрадиция қилиш масаласи “икки давлат ўртасидаги муносабатларни тиклаш учун енгиб бўлмас тўсиқ эмаслиги”ни таъкидлаган.

20 март куни Путин Aл-Жўлонийга ҳамкорликни давом эттириш таклифи ва унинг “вазиятни барқарорлаштириш бўйича саъй-ҳаракатларини” қўллаб-қувватлаш мазмунидаги мактубни йўллаган. Гап Сурияда ҳукумат қўшинлари ва Асад тарафдорлари ҳисобланган алавийлар ўртасида юз берган қуролли тўқнашувлар ҳақида кетмоқда. Март ойи бошида Суриянинг шимолий вилоятларида бўлиб ўтган ушбу жангларда мингдан ортиқ тинч аҳоли ҳалок бўлди.

Суриянинг янги мудофаа вазири Мурхаф Абу Касра Россиянинг Тартус ва Хмеймимдаги ҳарбий базалари масаласида Россия Сурияга зарур бўлган нарсани, масалан, Москвада яширинган Асадни таклиф қилса, объектларни сақлаб қолиши мумкинлигини айтган.

Маълумот учун, Башар Асад оиласи билан Москвадан сиёсий бошпана топган ва у ерда истиқомат қилмоқда.

• Музокара
• Путин
• Россия
• Suriya