Сурхондарё вилоятида эркак Қизил китобга киритилган сиртлонни ўлдирганлиги акс этган суратлар тарқалди.

Мазкур ҳолат Сурхондарё вилояти экология, атроф-муҳитни муҳофаза қилиш ва иқлим ўзгариши бошқармаси ходимлари ва Миллий гвардия ходимлари томонидан ўрганилган.

Маълум қилинишича, воқеа 2023 йилнинг октябрь ойи охири-ноябрь ойи бошларида Сурхондарё вилояти Шўрчи тумани “Ободон” маҳалласидаги “Такатош” массивида фуқаро Ш.Х. томонидан содир этилган. Эътиборлиси, мазкур ҳолат натижасида табиатга 1 млрд 60 минг сўм миқдорида зарар етказилган.

Ўрганиш натижаларига кўра, бир бош номаълум ҳайвоннинг суяклари топилиб, улар қайси ҳайвон турига тегишлилиги борасида илмий хулоса олиш мақсадида тегишли ташкилотларга жўнатилган.

Маълумот учун, ЖКнинг 202-моддасига кўра, Қизил китобга киритилган ҳайвонларни нобуд қилиш энг кам ойлик иш ҳақининг 400 бараваридан 600 бараваригача миқдорда жарима, 3 йилдан 5 йилгача озодликни чеклаш ёки 3 йилдан 5 йилгача озодликдан маҳрум қилиш билан жазоланади.

• Сурхондарё