Bloomberg хабарига кўра, Хитой ҳукумати АҚШда TikTok блокланишининг олдини олиш учун ижтимоий тармоқнинг Америкадаги бўлимини Илон Маскка сотиш имкониятини кўриб чиқмоқда.

Ушбу келишув амалга ошадиган бўлса, TikTok тадбиркорга тегишли Х платформаси назоратига ўтиши тахмин қилинмоқда. Хитой Трамп маъмурияти билан тарифлар ва экспорт назорати масалаларида “мураккаб музокаралар” ўтказиши керак. Агентликнинг таъкидлашича, TikTok билан бўладиган келишувга “муносабатларни яхшилаш учун имконият” сифатида қаралмоқда.

Ўз навбатида TikTok вакили Маскнинг ижтимоий тармоқни сотиб олиши ҳақидаги гапларни “уйдирма” деб атаган.

Маълумот учун, АҚШда 19 январдан TikTok’ни тақиқлаш ҳақидаги суд қарори кучга киради.

Аввалроқ, Оқ уйнинг бўлажак эгаси Доналд Трамп АҚШ Олий судидан Вашингтондаги янги маъмурият ҳокимият тепасига келгунига қадар TikTok тақиқини кечиктиришни сўрагани ҳақида хабар берилган эди.

• АҚШ
• Ilon_Mask
• TikTok
• Трамп
• Хитой
• тақиқ