Самарқанд шаҳрида жойлашган Конгресс марказида Туркий давлатлар ташкилоти саммити доирасида Ўзбекистон Республикаси Ташқи ишлар вазири Владимир Норов ва Туркий давлатлар ташкилоти собиқ Бош котиби Бағдод Амреев иштирокида матбуот анжумани ўтказилди.

Владимир Норов Туркий давлатлар ташкилоти саммити якунлари бўйича маълумот берди.

"Музокаралар якунлари бўйича 10 дан ортиқ кўп томонлама ҳужжат қабул қилинди. Бу эса ташкилот фаолиятининг истиқболли йўналишлари бўйича ҳамкорликни сифат жиҳатидан янги амалий мазмун билан тўлдиришга хизмат қилади.

Туркий инвестиция фондини қисқа муддатларда ташкил этиш тўғрисидаги битим ва Транспорт боғлиқлиги дастури имзоланди. Бу эса транспорт-логистика соҳасидаги ҳамкорликни янада чуқурлаштириш учун янги имкониятларни яратади", деди Норов.

Ташқи ишлар вазири саммит якунида Бағдод Култаевич Амреевнинг Бош котиблик ваколати тугагани таъкидлаб, давлат раҳбарлари унинг Туркий давлатлар ташкилоти доирасидаги ҳамкорликни мустаҳкамлашда ғайратли ва самарали фаолият кўрсатгани учун миннатдорчилик билдирганларини қайд этди.

Владимир Норов Бағдод Амреевга янги ишларида муваффақиятлар, Бош котиб Кубаничбек Омуралиевнинг келгусидаги фаолиятига зафарлар тилади.

• Матбуот анжумани
• Самарқанд
• Туркий давлатлар ташкилоти
• Владимир Норов
• саммит