Ўзбекистон Республикасининг Биринчи Президенти Ислом Абдуғаниевич Каримовнинг рафиқаси Татяна Акбаровна Каримова жорий йилнинг 9-июл куни бўлиб ўтган президентлик сайловида Шавкат Мирзиёевга овоз бергани маълум бўлди. Буни у ўз Инстаграмъдаги саҳифасига жойлаган суратдан билиб олиш мумкин.

У 10-июл куни сайлов участкасида овоз бераётгани тасвирланган суратни бир неча бор ижтимоий тармоқдаги саҳифасига жойлаштириб, сўнг яна ўчириб юборди.

“Қадрли дўстларим, афсуски, интернетда аввалроқ жойлаган фотосуратим билан боғлиқ атайлаб бузиб кўрсатилган маълумотлар пайдо бўлди. Менинг сайлов бюллетенимда гўёки бирорта ҳам номзод белгиланмагандек кўринган. Шунинг учун мен аниқлик киритишни зарур деб биламан. Ижтимоий тармоққа жойлашда сурат сифати ёмонлашиши ва суратдаги айрим деталлар аниқ кўринмаслигини ҳамма яхши билади”,– деб ёзади Каримова хоним.

Шундан кейин, сўнгги жойлаган суратида Татяна Каримова сайлов бюллетенида айнан Шавкат Мирзиёев номзоди белгилангани акс этган. Бу орқали Татяна Каримова Шавкат Мирзиёев номзодига белги қўйганини исботлашга уринган.

“Мана асл фотосурат, бу менинг танловимни аниқ кўрсатади”– дея ўз ҳаракатига изоҳ берган у.

Таъкидлаб ўтиш керакки , аввалига Каримова жойлаган айнан шу кўринишдаги суратда у сайлов бюллетенида ҳеч бир номзодни белгиламай, уни сайлов қутисига ташлаёттгани акс этган. Орадан вақт ўтиб, у ушбу суратни ўчириб юборган. Ижтимоий тармоқда эса "Татяна Каримова сайловда ҳеч кимга овоз бермади" номли хабарлар тарқалди.

Маълумот учун, келаси ой 75 ёшни қаршилайдиган Татяна Каримова турмуш ўртоғи Ислом Каримовнинг вафотидан кейин Тошкентда ёлғиз истиқомат қилиб келмоқда. Унинг тўнғич қизи Гулнора Каримова бир қатор жиноятларда айбланиб, қамоқда сақланмоқда.

• Гулнора Каримова
• Ислом Каримов
• Мирзиёев